Descubren unha nova especie de lagarto da época dos dinosaurios

Unha nova especie de lagarto, concretamente da familia das iguanas, que habitou na Terra durante a época na que existiron os dinosauros foi descuberta por un grupo de investigadores da Universidade de Washington. O lugar onde se produciu o achado é en Egg Mountain, no estado norteamericano de Montana, preto da fronteira entre Canadá e EEUU. O estudo foi publicado na revista Proceedings of the Royal Society of London B.
O réptil foi denominado polos científicos como Magnuviator ovimonsensis. Os dous restos fósiles foron achados nun "excepcional" estado, e coa estrutura do corpo practicamente completa. Estímase que estes lagartos viviron durante o Cretácico (fai 75,5 millóns de anos), pero os investigadores non teñen claro aínda cando se extinguiu o réptil. "Este descubrimento podería axudarnos a entender cando e como os lagartos desenvolveron as súas actuais anatomías", informa o autor principal do estudo, David DeMar, doutor asociado na Universidade de Washington de Bioloxía.
"O Magnuviator ten unha morfoloxía única. Ten unha combinación de características anatómicas que ningún outro lagarto posúe", apunta DeMar. Por exemplo, esta especie de lagarto ten na parte inferior un óso da espinilla, característica que non se atopa en ningún fósil de iguana. Ademais, os investigadores norteamericanos relacionan este exemplar con outra especie de lagarto atopada en Mongolia e chamada Temujiniidae. Estes dous exemplares poderían descender dun devanceiro común. A característica común entre estas dúas especies é que ambas habitaban nun hábitat semiárido.
Con respecto á alimentación destes lagartos, o estudo contempla que a súa fonte de comida poderían ser as avispas, aínda que non descartan que polo seu tamaño (40 centímetros aproximadamente) poderían inxerir outro tipo de alimentos. 

"Dada a escaseza de lagartos documentados no rexistro fósil do Cretácico, o máis excitante deste achado neste momento é, precisamente, que se produciu", argumenta Luís Alcalá, director xerente da Fundación Conxunto Paleontolóxico de Teruel-Dinópolis.
"Con todo, sábese moi pouco da existencia do animal", conclúe Alcalá.
"Os descubrimentos como Magnuviator dannos unha visión rara das especies de lagartos que estaban presentes antes da extinción dos dinosauros", argumenta o documento do estudo. Greg Wilson, participante da publicación e profesor adxunto na Universidade de Washington en Bioloxía, engade: "Cremos que os dinosauros carnívoros e herbívoros viñeron a Egg Mountain repetidamente para aniñar, e no proceso de escavación deste sitio estamos a aprender máis e máis sobre outras criaturas que viviron e morreron alí".