Atopada unha das pegadas de dinosauro máis grandes do mundo

A pisada de máis dun metro de diámetro estaba “en moi bo estado de conservación”

Existen pegadas que deixan marcas profundas. Pero non todas corresponden a un titanosaurio que habitaba o planeta durante a época do Cretácico Tardío, fai entre 70 e 90 millóns de anos.

A maior pegada de dinosauro foi descuberta no deserto de Gobi, unha rexión entre o norte de China e o sur de Mongolia. Os investigadores que participaron na escavación, entre eles, o profesor Shinobu Ishigaki, cren que se trata dun exemplar de titanosaurio, que pertence á familia dos saurópodos, unha especie herbívora e cuadrúpeda caracterizada polo seu pescozo longo.

Científicos da Academia de Ciencias de Paleontoloxía de Mongolia e da Universidade de Ciencias de Okayama de Xapón que formaban a expedición atoparon a pisada da pata traseira esquerda con marcas “de tres garras e en moi bo estado de conservación”, segundo o profesor Ishigaki. Os labores de escavación comezaron o 21 de agosto deste ano.

O tamaño da pegada é de 106 por 77 centímetros, polo que se estima que a lonxitude do animal oscilaría entre os 20 e 35 metros de longo e o seu peso sería de 40 toneladas, aproximadamente.

O curioso deste descubrimento é que non é unha “pegada cóncava”, é dicir, non está afundida e así se preservou durante o paso do tempo, senón que diversos sedimentos que transportan area grosa depositáronse nesa pegada adoptando a súa forma.

Pero este non é o único achado feito na zona. Os membros da investigación deron con outras pisadas do titanosaurio, que, ao ser consecutivas, permitirían “calcular a velocidade do movemento” e o peso do animal. Crese que o modo de camiñar deste exemplar era “arrastrando as súas patas dianteiras”, polo que esas pegadas serían máis difusas e non se conservaron.

Tamén localizaron, tras seis días conducindo polo deserto, un gran número de pegadas fósiles doutros animais dispersas pola zona, como os terópodos, unha especie carnívora e bípeda que se extinguiu fai 66 millóns de anos.

Con todo, esta non é a primeira pegada grande de dinosauro achada. En Marrocos e Francia tamén hai restos de pisadas de tamaño similar ao achado no deserto de Gobi.